ليش في مشكلة بنايلة التويني: تحليل سيكونسوي

ايلة هي بنت ثورة الأرز وما أدراك ما ثورة الأرز. أكتر ثورة شوفنيية و”كلاس” مارقة على المنطقة، ثورة بتددعي وبتحكي بكل القيم الحقوقية والديموقراطية والمتحضرة بس هي فعليا بعيدة كل البعد عن هيدي الكلمات الكبيره، هي نفسها هيدي الثورة يلي يمكن تكون تسببت بمقتل عشرات العمال السوريين المعترين، بس عن دون قصد أكيد

نايلة هي عضوة بالمجلس النيابي اللبناني حالياً بس ما شفنا منها شي .يمكن لأنها وصلت لمحل ما هي اليوم مش عن جدارة وكاريزما وقوة معينه بل لأنها للأسف متلها متل بقية النسوان في هذا البرلمان المبجل العظيم وصلت من ورا ماضي أبوها الشهيد. نايلة زغتورة ومهضومه وقريبة على القلب فتخيلنا إنو معقول تكون بتفرق شوي عن يلي معها وقبلها، للأسف ما طلع هيدا الشي صح و تبرهن العكس، فكرناها صبيه من عمرنا فمعقول يكون عندها ولع أو حماس أو إندفاع على التغيير على صعيد الشباب واحتياجاتهم/ن كونها شابة، وعلى صعيد النساء والمليون حق يلي أكلتو الدولة عليهن وطلع لا هيدا ولا هيدا بهموها. لحديد هلأ ما مبين إنو هي بتفرق واحد بالمئة عن السيستم يلي نحن عم بنحاربو لا بل هي منو وفي.

نايلة متزوجه “صحافي” من أشطر الصحافية عندنا بلبنان. بياخد أكثر المواضيع الحساسة و بسخفها بدل ما يوصلها للعالم ويوعيهم عليها، بعامل العالم المستضعفين بهيدا المجتمع وبحطهم قدام المشاهدين و كأنون فئران مختبر. نايلة ما كتير بتفرق عن نايلة التانية بالبرلمان يلي كمان شاء القدر إنو توصل من ورا زوجها وشاء القدر إنو تورث ابنها المنصب قبل أن تتنحى، نايلة (الثانية) يلي بتمثل الذكورية أكثر من أي ذكر موجود بل بارلمن يلي بتجمع بونبون هي وعم تتسامر مع صولانج بدل ما تكون عم تعمل شي مفيد للبشرية مقابل الملايين يللي عمبتكبها عليها الشعب الجوعان.

نايلة ما بتتعاطى بشؤون المرأة، فما بالكم بالشؤون النسوية، القوة السياسيه يللي عندها ياها كلياً معزوله عن القوى السياسية يللي نحنا كنسويات بدنا تُستعمل بهيك منصب .ايمتى حكيت نايلة بحق المرا باعطاء الجنسية؟بالعنف الأسري ؟بالتحرش الجنسي؟ بحقوق الأجنبيات يللي عم “تتفركش” عن البلكون وتموت كل يوم والتاني؟

ايمتى؟ شو موقفها من مئات الصراعات يللي عم بتعيشا النسوان كل يوم بسبب غياب قوانين وعدم تطبيق القوانين الموجودة ؟

في أنواع عنصرية مزعجة أكتر من غيرها، متل العنصرية اللاذعة والمستشرية بعقلية بعض الناس وأحسن مثال هو نايلة تويني النائب(ة) بمجلس النواب اللبناني.

نايلة ما بتفهم امور معقدة، حتى الامور يللي مش معقدة وبسيطة كتير متل انو هيدي الشريحة من البشر يللي اسما فلسطينية هنِي عالم عندن حقوق جوهرية غصب عن راس كل لبناني عنصري.

متل انو هايدول الفلسطينية منُن قاعدين بلبنان على راحة الحياة في ونظافة بحرو وهضامة شعبه، قاعدين هون لأنو ما عندهن خيار تاني، متل انو هايدول الفلسطينية منُن ناعمنين بحياة كريمة او حقوق متلتلة متل ما هي متخيلة او حدا مخبرها بالغلط، متل ما انو البلدان العربية التانية يللي فيها فلسطينية وبتعاملهم مليون مرة اشرف واكرم من السيستيم اللبناني(يللي هي بنظرها مكرمهم اكتر من اللزوم) ويلي حاكم عليهم بالحرمان من ابسط حقوقهن.

انو اذا الشي الوحيد يللي قادر يعمله الفلسطيني هون هو انو يحكي وما حدا يسمعلو، ما بيعني انو الشعب اللبناني ونايلة لازم تحملهن جميلة وتقلهن هيدا الشي “بيكفي واسكتوا عن كل شي تاني مانعينكم عنه”، انو للواحدة تكون بتدافع عن حقوق الانسان بدا تكون عم بتدافع وتشوف القمع على صعيد كل العالم، مواطنين او مقيمين، مش بس على صعيد العرق اللبناني السامي وكل حدا تاني عمرو ما ينعطى حقوق.

وفكرة انو الاغلاط يللي صارت بالحرب الاهلية ما بتنلام بس على الاطراف الفلسطينية بس على كل الاطراف بشكل متساوي، وبغض النظر، هايدة الشي ما فينا نعميللو بروجيكشن (اسقاط) على ال500،000 فلسطيني يللي مهجرين هو،نايلة عم تكون عنصرية، عن قصد او جهل، بس عنصرية وللعضم. وعم تخلق من وراها، عن قصد او غيره، ارطة ناس عنصرية عالعمى متلها لاحقينها وعم يقرؤلها ويزقفولها، وبالنهاية اذا ما بتعرف عن موضوع معين كفاية ما ضروري تكتب عنه هالقد.

ما ضروري تخلفي وتعيدي عبارات وجمل غيرك قالوها قبل، تفاهات واكاذيب ومغالطات شو عرَفك اصلاً! بحياتك دعستي بمخيم؟ حكيتي مع ام فلسطينية صارلها 40 سنة هون؟ ولَا فلسطيني بوحدة من مدارس الاونروا؟ ولاَ العمو يللي فل من عكا لهون على رجليه وبعدو ناطر يرجع؟  ولَامع ناس مشردين تلات مرات ورا بعضهن من نهر البارد.

المشكلة بنايلة انو العالم مش شايفين انو في مشكلة واثنين وثلاثة فيها.